کوئٹہ کے نواحی علاقے ہزارہ ٹاون کے سبزی منڈی میں زور دار دھماکا ہوا ہے جس کے نتیجے میں 28 افراد جاں بحق اور درجنوں زخمی ہوگئے ہیں جن میں خواتین اور بچے بھی شامل ہیں، جبکہ 12 زخمیوں کی حالت تشویشناک بتائی جاتی ہے اور ہلاکتوں میں اضافے کا خدشہ بھی ظاہر کیا جارہا ہے۔
دھماکے اس قدر زور دار تھا کہ اس کی آواز تقریباً پورے شہر میں سنی گئی۔ دھماکے کے بعد پولیس اور ایف سی نے علاقے کو گھیرے میں لے لیا اور کسی کو بھی علاقے میں جانے کی اجازت نہیں دی جارہی، تاکہ کسی دوسرے دھماکے کی صورت میں نقصان نہ ہو۔ دھماکے کے مقام پر امدادی کارروائیاں جاری ہیں، زخمیوں کو سول اور بی سی اسپتال منتقل کیا جارہا ہے جبکہ اسپتالوں میں ایمرجنسی بھی نافذ کردی گئی ہے۔ نمائندہ کے مطابق بم ڈسپوزل اسکواڈ تاحال دھماکے کے مقام پر نہیں پہنچا، علاقے میں وقفے وقفے سے فائرنگ کا سلسلہ بھی جاری ہے۔ دوسری جانب مشتعل افراد نے کیرانی روڈ اور قریب کے دیگر علاقوں کو بند کرادیاہے۔